ବ୍ରଜରାଜନଗର ଉପନିର୍ବାଚନ: ଟିଭି ଓ ଖବରକାଗଜରେ ପ୍ରାର୍ଥୀ ଦେବେ ଅପରାଧିକ ବିବରଣୀ

ଭୁବନେଶ୍ୱର: ଝାରସୁଗୁଡା ବ୍ରଜରାଜଗନଗର ବିଧାନସଭାରେ ଉପନିର୍ବାଚନ ହେବ। ଏଥିପାଇଁ ବିଧିବଦ୍ଧ ଭାବେ ନିର୍ବାଚନ ବିଜ୍ଞପ୍ତି ପ୍ରକାଶ ପାଇଛି। ବୁଧବାର ନିର୍ବାଚନ ଅଧିକାରୀ ସୁଶୀଲ କୁମାର ଲୋହନି ନିର୍ବାଚନ ବିଜ୍ଞପ୍ତି ବାବଦରେ ସାମ୍ବାଦିକ ସମ୍ମିଳନୀ କରି ଆଚରଣ ବିଧି ଲାଗୁ ହେବା ସହିତ ଅନ୍ୟାନ୍ୟ ନିୟମ ବାବଦରେ କହିଛନ୍ତି।

ସେ କହିଛନ୍ତି, ଝାରସୁଗୁଡା ଜିଲ୍ଲାରେ ନିର୍ବାଚନ ଆଚରଣ ବିଧି ବିଦ୍ଧିବଦ୍ଧ ଭାବରେ ଲାଗୁ ହୋଇଛି। ପ୍ରାର୍ଥୀମାନେ ଭୋଟ୍ ପଡିବା ପୂର୍ବରୁ ଅପରାଧିକ ବିବରଣୀ ବାବଦରେ ଅନୂନ୍ୟ ତିନି ଥର ଟିଭି ଏବଂ ଖବରକାଗଜରେ ପ୍ରକାଶ କରିବା ବାଧ୍ୟତାମୂଳକ। ସେହିପରି କରୋନା ନିୟମ ଅନୁଯାୟୀ ପ୍ରାର୍ଥୀ ପ୍ରଚାର କରିବେ । ଆଚରଣ ବିଧି ନିୟମ ଉପରେ ନଜର ରଖିବାକୁ ସ୍ୱତନ୍ତ୍ର ଟିମ୍ ଗଠନ ହୋଇଛି। ଏଥିସହ ବୁଧବାର ପାଖରୁ ନାମାଙ୍କନ ଦାଖଲ ପ୍ରକ୍ରିୟା ଆରମ୍ଭ ହୋଇଛି ବୋଲି କହିଛନ୍ତି।

ଆସନ୍ତା 11 ତାରିଖ ଯାଏ ଆଶାୟୀମାନେ ନାମାଙ୍କନପତ୍ର ଦାଖଲ କରିପାରିବେ। ମେ’ 12ରେ ନାମାଙ୍କନପତ୍ର ଯାଞ୍ଚ ହେବ। 17 ଯାଏ ପ୍ରାର୍ଥୀମାନେ ଚାହିଁଲେ ସେମାନଙ୍କ ନାମାଙ୍କନପତ୍ର ପ୍ରତ୍ୟାହାର କରିପାରିବେ। ଉପନିର୍ବାଚନରେ ମୋଟ୍ 2 ଲକ୍ଷ 14 ହଜାର 261 ଭୋଟର ସେମାନଙ୍କର ମତାଧିକାର ସାବ୍ୟସ୍ତ କରିବେ। ନିର୍ବାଚନରେ 279ଟି ବୁଥରେ ମତଦାନ ହେବ। ମେ’ 31ରେ ଭୋଟ୍‌ ଗ୍ରହଣ ହେବ।

ସୂଚନାଯୋଗ୍ୟ, ବିଜେଡି ବିଧାୟକ କିଶୋର ମହାନ୍ତିଙ୍କ ଦେହାନ୍ତ ପରେ ଏହି ଆସନ ଖାଲି ପଡ଼ିଛି । ଡିସେମ୍ବର 30ରେ କିଶୋର ମହାନ୍ତିଙ୍କ ମୃତ୍ୟୁ ଘଟିଥିଲା। ନିୟମ ଅନୁଯାୟୀ ନିର୍ବାଚିତ ପ୍ରତିନିଧିଙ୍କର ବିୟୋଗ ହେଲେ 6 ମାସ ମଧ୍ୟରେ ଖାଲି ପଡିଥିବା ସ୍ଥାନ ପୂରଣ ହେବ । ଏହି ନିୟମରେ ଜୁନ 30ବେଳକୁ ବିଧାୟକଙ୍କ ମୃତ୍ୟୁକୁ 6 ମାସ ପୂରଣ ହେବ।