ବ୍ରଜରାଜନଗର ଉପନିର୍ବାଚନ ପାଇଁ ବିଧାୟକ ପ୍ରାର୍ଥୀ ହେବେ କି ମନ୍ତ୍ରୀଙ୍କ ଝିଅ ?

ଝାରସୁଗୁଡା: ବ୍ରଜରାଜନଗର ବିଧାନସଭା ଉପନିର୍ବାଚନ ପାଇଁ କିଏ ହେବେ ବିଧାୟକ ପ୍ରାର୍ଥୀ । ଦିବଂଗତ ବିଧାୟକ କିଶୋର ମହାନ୍ତିଙ୍କ ବିୟୋଗ ପରେ ଏହି ଆସନକୁ ନେଇ ଚାଲିଛି ବିଜେଡି ଦଳରେ ଛକାପଞ୍ଝା। ସ୍ୱାସ୍ଥ୍ୟମନ୍ତ୍ରୀ ତଥା ଝାରୁସୁଗୁଡା ବିଧାୟକ ନବ ଦାସ ଉପନିର୍ବାଚନରେ ପ୍ରାର୍ଥୀ କିଏ ହେବେ ସେନେଇ ଅଙ୍କକଷୁଥିବା ବେଳେ ତାଙ୍କ ଝିଅ ଦୀପାଳି ଦାସଙ୍କୁ ବିଧାୟକ ପ୍ରାର୍ଥୀ କରିବାକୁ ନବଙ୍କ ସମର୍ଥକ ଦାବି କରିଛନ୍ତି । ଯାହାକି ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।

ନରସିଂହପୁର ବିଷ୍ନୁପ୍ରିୟା ଚାରିଟେବୁଲ ଟ୍ରଷ୍ଟ ଲଖନପୁର ଜୋନରେ ଆମ୍ବୁଲାନ୍ସ ସେବାର ଉଦଘାଟନ ହୋଇଛି । ଏହି ଅବସରରେ ମୁଖ୍ୟ ଅତିଥି ଭାବେ ଯୋଗ ଦେଇ ଆମ୍ବୁଲାନ୍ସ ସେବାର ଉଦଘାଟନ କରିଥିଲେ ଦୀପାଳି ଦାସ । ଏହି ଅବସରରେ ଲଖନପୁରର ପୂର୍ବତନ ବ୍ଲକ ଅଧ୍ୟକ୍ଷ ଗୌତମ ପ୍ରଧାନ କହିଛନ୍ତି, ଦୀପାଳି ଦାସଙ୍କୁ ବିଧାୟକ ପ୍ରାର୍ଥୀ କରିବା ଠିକ୍ ହେବ । ଏଠିକାର ଲୋକେ ତାଙ୍କୁ ବିଧାୟିକା ଭାବେ ଦେଖିବାକୁ ଚାହୁଁଛନ୍ତି । ଏଥିସହ ସେ ବିଧାୟିକା ପ୍ରାର୍ଥୀ ହେବାକୁ ଯୋଗ୍ୟ ବୋଲି ଗୌତମ କହିଛନ୍ତି ।

ବ୍ରଜରାଜନଗର ଆସନରୁ କିଶୋରଙ୍କ ପରିବାର ଲୋକଙ୍କ ମଧ୍ୟରୁ କାହାକୁ ଟିକେଟ ଦେଇ ଶାସକ ଦଳ କିଶୋରଙ୍କ ସମର୍ଥକଙ୍କୁ ପାଖରେ ରଖିବାକୁ ଚାହୁଁଛି । ଅନ୍ୟପଟେ ନବ ଦାସଙ୍କ ଝିଅ ଯଦି ବିଧାୟକ ପ୍ରାର୍ଥୀ ହୋଇ ବିଜୟୀ ହୁଅନ୍ତି ତାହେଲେ ଉଭୟ ଝାରସୁଗୁଡା ଏବଂ ବ୍ରଜରାଜନଗର ଆସନ ଗୋଟିଏ ପରିବାର ପାଖରେ ରହିଯିବ । ଏପରି ହେଲେ ଆଗକୁ ବଢୁଥିବା ବିଜେଡିକୁ ଝଟକା ବି ଲାଗିପାରେ ।

ଅନ୍ୟପଟେ ଦୀପାଳିଙ୍କ ବାପା ଝିଅକୁ ବିଧାୟକ କରିବାକୁ ଆସିଥିବା ପ୍ରସ୍ତାବକୁ ଖାରଜ କରିଛନ୍ତି । କିଏ ବିଧାୟକ ପ୍ରାର୍ଥୀ ହେବେ ତାହା ଦଳ ସ୍ଥିର କରିବ ସେ ନୁହେଁ ବୋଲି ସଫେଇ ଦେଇଛନ୍ତି।