ଦ୍ୱାଦଶ ଶ୍ରେଣୀ ପରୀକ୍ଷା ନେଇ ସମସ୍ତ ରାଜ୍ୟର ମତାମତ ଲୋଡିଲା କେନ୍ଦ୍ର

ନୂଆଦିଲ୍ଲୀ: ଦ୍ୱାଦଶ ବୋର୍ଡ ପରୀକ୍ଷା କିପରି ଓ କେବେ କରାଯିବ ସେନେଇ ରବିବାର ଦିନ କେନ୍ଦ୍ର ଏବଂ ସମସ୍ତ ରାଜ୍ୟ ମଧ୍ୟରେ ଏକ ବୈଠକ ହୋଇଥିଲା। ଏଥିରେ ଦିଲ୍ଲୀ ସରକାର ଦ୍ୱାଦଶ ବୋର୍ଡ ପରୀକ୍ଷା ବାତିଲ କରିବାକୁ ପରାମର୍ଶ ଦେଇଛନ୍ତି। ଯେତେବେଳେ ସ୍ଥିତି ସୁଧୁରିବ ସେତେବେଳେ ଅଧିକାଂଶ ରାଜ୍ୟ ପରୀକ୍ଷା କରିବା ଦରକାର ବୋଲି ଶିକ୍ଷା ମନ୍ତ୍ରୀ ମନୀଷ ସିସୋଦିଆ କହିଛନ୍ତି। ମହାରାଷ୍ଟ୍ର କହିଛି ଯେ ଛାତ୍ରମାନଙ୍କୁ ସୁରକ୍ଷିତ ପରିବେଶ ଯୋଗାଇବା ହେଉଛି ସେମାନଙ୍କର ପ୍ରାଥମିକତା। ତେବେ ଆସନ୍ତା 25 ତାରିଖ ସୁଦ୍ଧା କେନ୍ଦ୍ର ସରକାର ସମସ୍ତ ରାଜ୍ୟରୁ ପରାମର୍ଶ ଲୋଡିଛନ୍ତି।

ରବିବାର ଅନୁଷ୍ଠିତ ଏହି ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଅଧ୍ୟକ୍ଷତା କରିଥିଲେ। ବୈଠକରେ କେନ୍ଦ୍ର ଶିକ୍ଷା ମନ୍ତ୍ରୀ ରମେଶ ପୋଖରିଆଲ ନିଶଙ୍କ, ମହିଳା ଏବଂ ଶିଶୁ ବିକାଶ ମନ୍ତ୍ରୀ ସ୍ମୃତି ଇରାନୀ ଏବଂ କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ଯୋଗ ଦେଇଥିଲେ। ଏମାନଙ୍କ ବ୍ୟତୀତ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ଶିକ୍ଷା ମନ୍ତ୍ରୀ ତଥା ଶିକ୍ଷା ସଚିବମାନେ ମଧ୍ୟ ଉପସ୍ଥିତ ଥିଲେ।

କେନ୍ଦ୍ର ଶିକ୍ଷା ମନ୍ତ୍ରଣାଳୟ ବର୍ତ୍ତମାନ ସମସ୍ତ ରାଜ୍ୟକୁ ଆସନ୍ତା 25 ତାରିଖ ସୁଦ୍ଧା ଦ୍ୱାଦଶ ସିବିଏସ୍ଇ ବୋର୍ଡ ପରୀକ୍ଷା ସମ୍ପର୍କରେ ମତାମତ ପଠାଇବାକୁ କହିଛି। ଶିକ୍ଷା ମନ୍ତ୍ରୀ ଏବଂ ସିବିଏସ୍ଇ ଅଧିକାରୀମାନେ ଜୁନ୍ 1 ରେ ବୈଠକ କରିବାର କାର୍ଯ୍ୟକ୍ରମ ରହିଛି, ଏହି ବୈଠକରେ ଦ୍ୱାଦଶ ବୋର୍ଡ ପରୀକ୍ଷାରେ ଚୂଡ଼ାନ୍ତ ନିଷ୍ପତ୍ତି ନିଆଯାଇପାରେ। ଏହି ବୈଠକ ସଫଳ ହୋଇଛି ବୋଲି କେନ୍ଦ୍ର ଶିକ୍ଷାମନ୍ତ୍ରୀ କହିଛନ୍ତି।

ସିବିଏସଇ କହିଛି ଯେ ଦ୍ୱାଦଶ ବୋର୍ଡ ପରୀକ୍ଷା ବାଧ୍ୟତାମୂଳକ ହେବା ଉଚିତ୍। ଏହାକୁ ଆଧାର କରି ଛାତ୍ରମାନେ କଲେଜରେ ଆଡମିଶନ ପାଆନ୍ତି। ଉଚ୍ଚ ଏବଂ ବୈଷୟିକ ଶିକ୍ଷାରେ ଆଡମିଶନ ପାଇଁ ଦ୍ୱାଦଶ ବୋର୍ଡ ପରୀକ୍ଷା ମଧ୍ୟ ଆବଶ୍ୟକ। କରୋନାରେ ସାମ୍ପ୍ରତିକ ପରିସ୍ଥିତିକୁ ଦେଖି ଶିକ୍ଷା ମନ୍ତ୍ରୀ ନିଶଙ୍କ କହିଛନ୍ତି ଯେ ମୁଁ ପୁଣିଥରେ କହିବାକୁ ଚାହେଁ ଯେ ଛାତ୍ର ଓ ଶିକ୍ଷକଙ୍କ ସୁରକ୍ଷା ଉଭୟଙ୍କ ପାଇଁ ଆମର ଭବିଷ୍ୟତ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।