ଜ୍ବାଇଁର ଛୁରୀ ମାଡ଼ରେ ଶ୍ବଶୁର ଘରର ୩ ସଦସ୍ୟ ଗୁରୁତର ଆହତ

ଝାରସୁଗୁ଼ଡ଼ା: ବୁଧବାର ସକାଳେ ଝାରସୁଗୁଡ଼ା ମ୍ୟୁନିସିପାଲିଟି ଅନ୍ତର୍ଗତ ପୁରୁଣାବସ୍ତିରେ ଅଭାବନୀୟ ଘଟଣା। ଜ୍ବାଇଁର ଛୁରୀ ମାଡ଼ରେ ଗୋଟିଏ ପରିବାରର ୩ ଜଣ ଗୁରୁତର ଆହତ ହୋଇଛନ୍ତି। ଆହତମାନେ ହେଲେ ରାମକୃଷ୍ଣ ଦାଶ (୫୯) ତାଙ୍କ ସ୍ତ୍ରୀ ବୀଣା ଦାଶ (୫୩) ଓ ସ୍ୱାଗତ ଦାଶ (୩୧)।

ବୁଧବାର ସକାଳ ପ୍ରାୟ ସାଢ଼େ ୮ଟାରେ ଏପରି ଏକ ଘଟଣା ଘଟିଛି। ରାମ କୃଷ୍ଣଙ୍କ ଜ୍ୱାଇଁ ସାମସନ୍ କୁମାର ପୁରୁଣାବସ୍ତିରେ ଥିବା ଶ୍ୱଶୁର ଘରକୁ ଆସିଥିଲେ। ଏହି ସମୟରେ ସାମସନର ପତ୍ନୀ ସ୍ୱାତୀ ଦାଶ (୩୯)ଙ୍କ ସହ କୌଣସି କଥାକୁ ନେଇ ଯୁକ୍ତିତର୍କ କରିଥିଲେ। ପରେ ତାଙ୍କ ପତ୍ନୀଙ୍କୁ ମାଡ଼ ମାରିଥିଲେ। ଏହି ସମୟରେ ନିଜ ଝିଅକୁ ବଞ୍ଚାଇବା ପାଇଁ ରାମକୃଷ୍ଣ ତାଙ୍କ ପତ୍ନୀ ବୀଣା ଦାଶ ଓ ପୁଅ ସ୍ୱାଗତ ଜ୍ବାଇଁ ସାମସନକୁ ଅଟକାଇବାକୁ ଚେଷ୍ଟା କରିଥିଲେ।

କିନ୍ତୁ ସାମସନ୍ କୁମାର ନିଜ ଡାହାଣ ମୋଜା ଭିତରେ ଲୁଚାଇ ରଖିଥିବା ଛୁରୀ ବାହାର କରି ପରିବାରର ତିନିଜଣ ସଦସ୍ୟଙ୍କ ମୁହଁରେ ଆକ୍ରମଣ କରିଥିଲେ ଏବଂ ତୁରନ୍ତ ଏକ କାରରେ ସେଠାରୁ ପଳାଇ ଯାଇଥିଲେ। ଏହାପରେ ଆହତମାନଙ୍କୁ ତୁରନ୍ତ ଝାରସୁଗୁଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ତିନି ଜଣଙ୍କର ପ୍ରାଥମିକ ଚିକିତ୍ସା ହେବା ସହ ବ୍ୟାଣ୍ଡେଜ କରାଯାଇଛି।

ରାମକୃଷ୍ଣ ଦାଶ କହିଛନ୍ତି ତାଙ୍କ ଝିଅ ୨୦୧୧ ମସିହାରେ ବଲାଙ୍ଗିରର ସାମସନ୍ କୁମାରକୁ ପ୍ରେମ ବିବାହ କରିଥିଲା ଏବଂ ୩ ବର୍ଷ ପରେ ତାଙ୍କ ଝିଅ ବାର ଘରକୁ ଫେରି ଆସିଥିଲା। ପରେ ଆଉ ସ୍ୱାମୀଙ୍କ ଘରକୁ ଯିବାକୁ ଯିବନି ବୋଲି ମନା କରିଦେଇଥିଲା।
କାରଣ ବିବାହ ପରେ ସାମସନ ବଦଳି ଯାଇଥିଲେ। ବିଭିନ୍ନ ସମୟରେ ପତ୍ନୀଙ୍କୁ ମାଡ଼ ମାରିବା ସହିତ ଗାଳିଗୁଲଜ କରନ୍ତି।

ବୁଧବାର ସକାଳେ ସାମସନ୍ ଆସି ଝିଅ ସହ ମାରପିଟ୍ କରିବା ସହ ଚାପୁଡ଼ା ମଧ୍ୟ ମାରିଥିଲେ। ଏହା ପରେ ମୋ ପୁଅ ଓ ପତ୍ନୀଙ୍କ ସହ ମିଶି ଜ୍ବାଇଁକୁ ଅଟକାଇବାକୁ ଚେଷ୍ଟା କରିଥିଲୁ। ଏହି ସମୟରେ ସେ ମୋଜା ତଳେ ଲୁଚାଇ ରଖିଥିବା ଛୁରୀ ବାହାର କରି ଆମ ମୁହଁରେ ଆକ୍ରମଣ କରିଥିଲେ। ଏହା ପରେ ସେ ଘଟଣାସ୍ଥଳରୁ ଫେରାର ହୋଇଯାଇଥିଲେ।

ଝାରସୁଗୁଡ଼ା ଟାଉନ୍ ଥାନା ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ସାମସନ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉ ବୋଲି ସେମାନେ ଦାବି କରିଛନ୍ତି।