ବନ୍ଧୁକ ଦେଖାଇ ଧମକ ଦେଇଥିବା ଦୁଇ ଯୁବକକୁ ବାନ୍ଧି ନେଲା ପୁଲିସ

ଝାରସୁଗୁଡା: ମହମ୍ମଦ କମାଲ ଓ ଗୁଡୁ ସା’ ଗିରଫ। ଗତ ସପ୍ତାହରେ ବନ୍ଧୁକ ଦେଖାଇ ଏହି ଦୁଇ ଯୁବକ ଔଷଧ ଦୋକାନୀ ଏବଂ ଅନ୍ୟାନ୍ୟ ବ୍ୟବସାୟୀଙ୍କୁ ଧମକ ଦେଇଥିଲେ। ଏହାକୁ ନେଇ ବନହରପାଲି ଥାନାରେ ଲିଖିତ ଅଭିଯୋଗ ହୋଇଥିଲା। ପରେ ବନ୍ଧବାହାଲ, ବେଲପାହାଡ଼, ବ୍ରଜରାଜନଗର ଓ ସମ୍ବଲପୁର ଜିଲ୍ଲାର ରେଙ୍ଗାଲି ବ୍ଲକ୍‌ର ବିଭିନ୍ନ ସ୍ଥାନରେ ଚଢ଼ାଉ କରିଥିଲା ପୁଲିସ। ପରେ ଦୁଇ ଅଭିଯୁକ୍ତଙ୍କୁ ଧରିବାରେ ପୋଲିସ ସକ୍ଷମ ହୋଇଥିବା ଜଣାପଡ଼ିଛି।

ଦୁଇ ଅଭିଯୁକ୍ତ ଗିରଫ ହେବା ପରେ ବନ୍ଧବାହାଲ ବ୍ୟବସାୟୀ ସୁରକ୍ଷା ମାଗିଥିଲେ। ପରେ ବନ୍ଧବାହାଲରେ ଗୋଟିଏ ପ୍ଲାଟୁନ ଫୋର୍ସ ମୁତୟନ ହୋଇଛନ୍ତି।

ଉଲ୍ଲେଖଯୋଗ୍ୟ, ୨୧ ତାରିଖ ରାତି ପ୍ରାୟ ୧୦ଟା ସମୟରେ ଗିରଫ ଅଭିଯୁକ୍ତ ବନ୍ଧବାହାଲର ସାଇ ମେଡିକାଲ ଷ୍ଟୋର, ସାଇ ଡ୍ରେସ ଦୋକାନ, ସାହୁ ଜେନେରାଲ ଷ୍ଟୋର, ହୋଟେଲ ପ୍ରତୀକ ଓ ଆଖପାଖର ଆଉ କିଛି ଦୋକାନରେ ଦୁଇଜଣ ଯୁବକ ପଶି ୧୦ ଲକ୍ଷ ବଟି ମାଗିବା ସହ ବନ୍ଧୁକ ଦେଖାଇ ଧମକ ଦେଇଥିଲେ । ଏହି ସମସ୍ତ ଦୃଶ୍ୟ ସିସି ଟିଭିରେ କଏଦ ହୋଇଥିଲା । ଏ ନେଇ ଥାନାରେ ଏତଲା ପରେ ବନହରପାଲି ପୋଲିସ, ବନ୍ଧବାହାଲ ଫାଣ୍ଡି ପୋଲିସ ଯୁବକ ଦ୍ୱୟଙ୍କୁ ଧରିବା ପାଇଁ ସ୍ୱତନ୍ତ୍ର ଟିମ ତିଆରି କରିଥିଲେ।