ନିଶାଦ୍ରବ୍ୟ ବିକ୍ରି ଉପରେ ରୋକ୍ ଲଗାଇବାକୁ ଦାବି କରି ଥାନାରେ ଏତଲା

ଝାରସୁଗୁଡା: ସ୍ଥାନୀୟ ଅଞ୍ଚଳରେ ବେଆଇନ୍ ଭାବେ ବିକ୍ରି ହେଉଛି ଡ୍ରଗ୍ସ ଆଦି ନିଶାଦ୍ରବ୍ୟ । ଏହାକୁ ବିରୋଧ କରି ବୁଧବାର ୱାର୍ଡ ନମ୍ବର ୧୯ର ବାସିନ୍ଦା ଥାନାର ଦ୍ୱାରସ୍ଥ ହୋଇଛନ୍ତି । ଖବୁଶୀଘ୍ର ଏହି ବେଆଇନ୍ ନିଶାଦ୍ରବ୍ୟ ବିକ୍ରି ଉପରେ ରୋକ୍ ଲଗାଯାଉ ବୋଲି ଦାବି କରି ଝାରସୁଗୁଡା ଆଇଆଇସିଙ୍କ ନିକଟରେ ଏତଲା ଦାଖଲ ହୋଇଛି ।

ଅଭିଯୋଗ ଅନୁଯାୟୀ, ସ୍ଥାନୀୟ ଲୋକେ କହିଛନ୍ତି ଯେ, ଅସାମାଜିକ ଲୋକ ବେଆଇନ ନିଶା ଦ୍ରବ୍ୟକୁ ଅଧିକ ପ୍ରୋତ୍ସାହନ ଦେଉଛନ୍ତି । ତେଣୁ ସ୍ଥାନୀୟ ଅଂଚଳର ଲୋକମାନେ ଏହି ନିଶା କବଳରେ ପଡୁଛନ୍ତି । ଏହି କାରଣରୁ ମହିଳା ଓ ଝିଅ ମାନେ ସୁରକ୍ଷିତ ମଣୁନଥିବା କହିଛନ୍ତି । ତେଣୁ ଦୋଷୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ କହିବା ସହିତ ଯଦି ସମ୍ଭବ ତେବେ ଉକ୍ତ ଅଂଚଳରେ ସିସିଟିଭି ଲଗାଇବାକୁ ଦାବି କରିଛନ୍ତି ।