ଝାରସୁଗୁଡାରେ ମାଟ୍ରିକ ପରୀକ୍ଷା ପାସ୍ ହାର ୯୩.୭୩ ପ୍ରତିଶତ

ଝାରସୁଗୁଡା: ମାଧ୍ୟମିକ ଶିକ୍ଷା ପରିଷଦ (ବିଏସଇ) ଦ୍ୱାରା ପରିଚାଳିତ ଚଳିତ ବର୍ଷ ମାଟ୍ରିକ ପରୀକ୍ଷା ଫଳ ବୁଧବାର ପ୍ରକାଶ ପାଇଛି। ବିଏସଇ ପକ୍ଷରୁ ମିଳିଥିବା ସୂଚନା ଅନୁଯାୟୀ, ମାଟ୍ରିକ୍ ବା ଦଶମ ଶ୍ରେଣୀ ପରୀକ୍ଷାରେ ୯୦.୫୫ ପ୍ରତିଶତ ଛାତ୍ରଛାତ୍ରୀ ପାସ୍ କରିଛନ୍ତି। ଚଳିତ ବର୍ଷ ଦଶମ ଶ୍ରେଣୀ ପରୀକ୍ଷାରେ ୫ ଲକ୍ଷ ୨୬ ହଜାର ୮୧୮ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିବା ବେଳେ ସେମାନଙ୍କ ମଧ୍ୟରୁ ୫ ଲକ୍ଷ ୧୭ ହଜାର ୮୪୭ ଜଣ ପାସ୍ କରିଥିବା ବେଳେ ୮୬୯୯ ଜଣ ଫେଲ୍ ହୋଇଛନ୍ତି । ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ ଏହି ସୂଚନା ଦେଇଛନ୍ତି।

୮ ହଜାର ୧୧୯ ଜଣ ଛାତ୍ରଛାତ୍ରୀ ଏଓ୍ୱାନ ଗ୍ରେଡ୍ ପାଇଥିବା ବେଳେ ୫୪ ହଜାର ୮୮୯ ଜଣ ଏଟୁ ଗ୍ରେଡ୍ ପାଇଛନ୍ତି। ସେହିପରି ୧ ଲକ୍ଷ ୨୦ ହଜାର ୨୦୩ ଜଣ ଛାତ୍ରଛାତ୍ରୀଙ୍କୁ ବିଓ୍ୱାନ ଗ୍ରେଡ୍, ୧ ଲକ୍ଷ ୪୨ ହଜାର ୨୬୬ ଜଣଙ୍କୁ ବିଟୁ, ୧ ଲକ୍ଷ ୧୬ ହଜାର ୧୧୧ ସି, ୫୯ ହଜାର ୨୪୫ ଡି, ୧୪ ହଜାର ୬୪୭ ଇ ଓ ୭୭୯୦ ଜଣଙ୍କୁ ଏଫ୍ ଗ୍ରେଡ୍ ପ୍ରଦାନ କରାଯାଇଛି।

ମୋଟ ୧୧୭୦ଟି ସ୍କୁଲରେ ଶତ ପ୍ରତିଶତ ରେଜଲ୍ଟ ହୋଇଥିବା ବେଳେ ମାଲକାନଗିରି ଜିଲ୍ଲାରେ ଦୁଇଟି ଓ ଅନୁଗୁଳରେ ଗୋଟିଏ ସ୍କୁଲରେ ଶୂନ ରେଜଲ୍ଟ ହୋଇଛି। ମାଲକାନଗିରିର ଦୁଇଟି ସ୍କୁଲରେ ଜଣେ ଲେଖାଏଁ ଛାତ୍ରଛାତ୍ରୀ ଥିବାବେଳେ ଅନୁଗୁଳ ସ୍କୁଲରେ ଦୁଇଜଣ ଛାତ୍ରଛାତ୍ରୀ ଅଛନ୍ତି ବୋଲି ମନ୍ତ୍ରୀ ସୂଚନା ଦେଇଛନ୍ତି।

ସେହିପରି ଝାରସୁଗୁଡାରେ ୧୧୮ଟି ସ୍କୁଲରେ ୬୭୧୯ ଜଣ ଫର୍ମ ଫିଲ୍ ଅପ କରିଥିବା ବେଳେ ୩୪୫ ଜଣ ଛାତ୍ରୀଛାତ୍ରୀ ଅନୁପସ୍ଥିତ ଥିଲେ। ଜଣେ କପି କରି ଧରାପଡିଥିବା ବେଳେ ୭୯ ଜଣ ଏ ଓ୍ୱାନ ୯୯୧ ଜଣ ଏଟୁ ୨୦୫୬ ଜଣ ବିଓ୍ୱାନ ୧୮୨୪ ଜଣ ବିଟୁ, ୯୨୮ ଜଣ ସି, ୩୪୭ ଜଣ ଡି, ୭୩ ଜଣ ଇ, ୭୫ ଜଣ ଏଫ ଶ୍ରେଣୀରେ ରହିଛନ୍ତି । ଜିଲ୍ଲାର ମୋଟ୍ ୬୨୯୮ ପରୀକ୍ଷାର୍ଥୀଙ୍କ ମଧ୍ୟରୁ ୩୦୬୮ ଜଣ ଛାତ୍ର ଏବଂ ୩୨୩୦ ଜଣ ଛାତ୍ରୀ ଥିଲେ। ପାସ ହାର ୯୩.୭୩ ପ୍ରତିଶତ ରହିଛି।

ଗତବର୍ଷ କରୋନା ବେଳେ ସାରା ରାଜ୍ୟରେ ପାସ୍ ହାର ୯୭ ପ୍ରତିଶତ ଥିଲେ ମଧ୍ୟ ଛାତ୍ରଛାତ୍ରୀଙ୍କ ନବମ ଶ୍ରେଣୀ ପ୍ରଦର୍ଶନର ମୂଲ୍ୟାଙ୍କନ କରି ରେଜଲ୍ଟ ଘୋଷଣା କରାଯାଇଥିଲା। ଚଳିତ ବର୍ଷ ଏଓ୍ୱାନ ଓ ଏଟୁ ଗ୍ରେଡ୍ରେ ଛାତ୍ରଛାତ୍ରୀ ଯେଉଁଭଳି ନମ୍ବର ରଖିଛନ୍ତି ତାହା ପ୍ରଶଂସନୀୟ ବୋଲି ମନ୍ତ୍ରୀ କହିଛନ୍ତି।

ଉଲ୍ଲେଖଯୋଗ୍ୟ, ମୋଟ୍ ୫ ଲକ୍ଷ ୭୧ ହଜାର ୯୦୯ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ।