ସମ୍ବଲପୁର ପୁଲିସ କବଜାରେ ଜମତାରା ଗ୍ୟାଙ୍ଗର ସଦସ୍ୟ !

ଭୁବନେଶ୍ୱର: ରାଜଧାନୀ ଭୁବନେଶ୍ୱରରୁ ନିଖୋଜ 4 ଛାତ୍ର ଘଟଣାରେ ଟୁଇଷ୍ଟ । ନିଖୋଜ ହୋଇଥିବା ଛାତ୍ର ଏବେ ସମ୍ବଲପୁର ପୁଲିସକବଜାରେ । ଏହି ଚାରି ସଦସ୍ୟ ଝାଡଖଣ୍ଡର । ଏମାନେ ସାଇବର ଠକେଇ କରୁଥିବା ଜମତରା ଗ୍ୟାଙ୍ଗର ସଦସ୍ୟ ବୋଲି ଭୁବନେଶ୍ୱର ଡିସିପି ଉମାଶଙ୍କର ଦାସ  କହିଛନ୍ତି। ମଙ୍ଗଳବାର ଚାରି ଇଞ୍ଜିନିୟରିଂ ଛାତ୍ର ରହସ୍ୟମୟ ଭାବେ ନିଖୋଜ ହୋଇଥିବା ନେଇ ରିପୋର୍ଟ ପ୍ରକାଶ ପାଇଥିଲା।

ଏହି ଚାରିଜଣ ଛାତ୍ର, ସମସ୍ତେ ଝାଡଖଣ୍ଡର, ଭୁବନେଶ୍ୱରର ଏକ ଘରୋଇ ଇଞ୍ଜିନିୟରିଂ କଲେଜରେ ପଢୁଛନ୍ତି ଏବଂ ଫେବୃଆରୀ 22, 2022 ରୁ ଖଣ୍ଡଗିରି ଅଞ୍ଚଳରୁ ନିଖୋଜ ଥିବା ଜଣାପଡିଛି। ସୂଚନାନୁସାରେ, ଜାମତାରା ଗ୍ୟାଙ୍ଗର ଜଣେ ସଦସ୍ୟଙ୍କ ସହ ଲିଙ୍କ୍ ସମ୍ପର୍କରେ ପଚରାଉଚରା କରିବା ପାଇଁ ସମ୍ବଲପୁର ଜିଲ୍ଲାର ଅଇଁଠାପାଲି ପୋଲିସ ସେମାନଙ୍କୁ ଉଠାଇ ନେଇଥିଲା। ସାଇବର ଠକେଇର କୁଖ୍ୟାତ ଗ୍ୟାଙ୍ଗର ସଦସ୍ୟଙ୍କୁ ଟ୍ରାକିଂ କରୁଥିବାବେଳେ ପୋଲିସ ସେମାନଙ୍କ ଉପରେ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।

ଏହି ଚାରିଜଣ ଭୁବନେଶ୍ୱରର ତୋମାଣ୍ଡୋ ପୋଲିସ ଅଧିନରେ ଥିବା କଳିଙ୍ଗ ବିହାର ଅଞ୍ଚଳରେ ଏକ ଭଡା ଘରେ ରହୁଥିଲେ। ହଠାତ୍ ନିଖୋଜ ହେବା ପରେ ଚିନ୍ତିତ ପରିବାର ସଦସ୍ୟ ତୋାମାଣ୍ଡୋ ପୋଲିସ ନିକଟରେ ଅଭିଯୋଗ କରିଥିଲେ। ଅଭିଭାବକମାନେ ଟୁଇନ୍ ସିଟି ପୋଲିସ କମିଶନର ଏବଂ ଡେପୁଟି କମିଶନରଙ୍କ ନିକଟରେ ଅପହରଣ ହୋଇଥିବା ସନ୍ଦେହ କରି ତଦନ୍ତ କରିବାକୁ ଅଧିକାରୀମାନଙ୍କୁ ଅନୁରୋଧ କରିଥିଲେ।

ଡିସିପି ଉମାଶଙ୍କର ଦାସ କହିଛନ୍ତି, “ଛାତ୍ରମାନଙ୍କ ଅଭିଭାବକଙ୍କ ଅଭିଯୋଗ ପରେ ଆମେ ଏକ ଟିମ୍ ଗଠନ କରିଥିଲୁ ଏବଂ ପରେ ଜାଣିବାକୁ ପାଇଲୁ ଯେ ସେମାନେ ସମ୍ବଲପୁରରେ ଅଛନ୍ତି। ସେମାନେ ଅନ୍ୟ ଜଣେ ଯୁବକଙ୍କ ସହ ସମ୍ବଲପୁର ଯାଇଥିଲେ। ଜମତାରା ଗ୍ୟାଙ୍ଗ ସହିତ ପଞ୍ଚମ ବ୍ୟକ୍ତିଙ୍କର କୌଣସି ଲିଙ୍କ ଅଛି କି ନାହିଁ ଆମେ ଏପର୍ଯ୍ୟନ୍ତ ଜାଣିପାରୁ ନାହୁଁ। ”

ସେମାନଙ୍କ ଅଭିଭାବକମାନେ ଅପହରଣର ଆଶଙ୍କା ପ୍ରକାଶ କରିବା ପରେ ନିଖୋଜ ଛାତ୍ରମାନଙ୍କୁ ଖୋଜିବା ଆମର ମୁଖ୍ୟ ଲକ୍ଷ୍ୟ ଥିଲା। ଯେହେତୁ ସେମାନଙ୍କୁ ଚିହ୍ନଟ କରାଯାଇଛି, ସମ୍ବଲପୁର ପୋଲିସ ବର୍ତ୍ତମାନ ସବିଶେଷ ତଥ୍ୟ ପ୍ରକାଶ କରିପାରିବ। ଆମେ ମଧ୍ୟ ସମ୍ବଲପୁର ପୋଲିସ ସହ ଯୋଗାଯୋଗରେ ଅଛୁ ବୋଲି ଉମାଶଙ୍କର ଦାଶ କହିଛନ୍ତି।